Pasugatan Macapat Idul Fitri

Karumpaka dening :

KRT Sukoco Madunagoro

KMT Ida Madusari

KRT Purwadi Sosronagoro

Penyaji : Ingsun Sholihin

lihat video :  https://youtu.be/A2l50KtmhwM

Kinanthi

Idul Fitri dintenipun

Sanadyan mangsa pandemi

Kudu raket seduluran

pangapura lahir batin

ayem tentrem ing bebrayan

tata raharja sayekti

Terjemahan :

Hari Raya Idul Fitri, 

Walaupun masih dalam masa Pandemi, 

Harus tetap perkuat solidaritas persaudaraan, 

Juga tak lupa saling memberi maaf lahir dan bathin, 

Dengan demikian akan membuat tentram hati/ jiwa dan dalam kehidupan bermasyarakat, 

Pada akhirnya akan selamat sentaosa sejahtera kehidupan kita. 

1. Dhandhanggula Idul Fitri

Bagya mulya dinten Idul Fitri

sanak kadang dulur pawong mitra

sewu suka penggalihe

guyub rukun satuhu

ngraketake silaturahmi

apura ingapura

lahir batin tulus

nglebur kehing kaluputan

mbudi daya murih sampurnaning dhiri

Allah paring nugraha.

Surya terang wanci bangun enjing

kadang muslim sami tata tata

wiwit pasa akhir sore

Zakat Fitrah rumuhun

sinartan takbir tasbih tahmid

awang-awang ngumandhang

jroning batin sujud

pasrah marang Gusti Allah

ngluhurake asmane Hyang Maha Suci

tansah paring anugrah.

2. Pangkur Idul Fitri

Pahargyan hari lebaran

Idul Fitri ingkang den anti anti

tumibaning rahmat agung

tutug ngibadah siyam

amal kautaman meper hawa nafsu

adhedhasar kitab suci

wulang wuruking agama.

Sembahyang ing wanci enjang

wus katelah sembahyang Idul Fitri

manembah lumampah khusyuk

ngangkah antuk barokah

kang katuju mrih ayem tentreming kalbu

sumarambah kulawarga

bebrayan miwah negari.

Pasuryan sami sumunar

sambang sambung srawung silaturahmi

gupuh aruh sagah suguh

cepak grapyak sumanak

dhahar ngunjuk lenggah sareng katon sayuk

takbir tahmid kang ngumandhang

angrenggani jagad raya.

3. Kinanthi Idul Fitri Silaturahmi

Idul Fitri dintenipun

sumangga silaturahmi

ngraketake seduluran

pangapura lahir batin

ayem tentrem ing bebrayan

tata raharja sayekti.

Sanak kadang padha kumpul

sami dandan edi peni

nuli dhahar ngunjuk eca

pasuryan mubyar sumunar

perbawane hari raya

binerkahan ing sesami.

4. Kinanthi Idul Fitri Pasugatan

Pasugatan para tamu

jroning hari Idul Fitri

lonthong opor tahu kupat

jadah jenang emping kripik

segere wedang unjukan

dhahar ngunjuk warni-warni.

Busana endah kadulu

clana anyar sarung peci

sabuk sandhal baju takwa

katon asri edi peni

kabeh mahargya lebaran

pinanggih kamulyan jati

5. Pucung Idul Fitri Suka Sukur

Suka sukur dhateng Ingkang Maha Luhur

wus paring nugraha

jroning hari Idul Fitri

paripurna ngibadah wulan puasa.

Siyang dalu amung siji kang kadulu

wewarah agama

ngraketke silaturahmi

jawat asta ngluberaken pangaksama.

Pra sedulur sanak kadang mitra batur

sungkem ibu bapak

ingkang eyang kakung putri

murih berkah sarana nyuwun palilah.

Sarwa jumbuh kasembadan kang ginayuh

dayane lebaran

sumendhe wahyu Ilahi

sinar terang Idul Fitri sung pepadhang.

6. Pucung Idul Fitri Jajanan

Gupuh aruh jamak lumrah suguh dhayuh

ing mangsa lebaran

nuju hari Idul Fitri

wajik jenang jadah kripik lan rengginang

Kupat tahu lonthong opor pancen perlu

emping madu mangsa

lepet karak karo intip

opak rambak krumiyuk rasane enak

Para tamu lenggah eca mesem ngguyu

kabar kinabaran

rembukan silaturahmi

dina bada dhaharan kebak ing meja

Nuli ngunjuk jahe anget sarwa mathuk

wedang rondhe secang

gula asem teh lan kopi

tanpa sayah srupat sruput tandha bungah

Suka sukur bebrayan nemahi makmur

sandhang pangan papan

rejekine mbanyu mili

anugerah kanggo sangune ngibadah.

7. Sinom Idul Fitri

Sasi pasa paripurna.

ngancik hari Idul Fitri.

tan kalepyan bayar zakat.

rinengga kumandang takbir.

ngiringi tasbih tahmid.

pinanggih lan kanca dulur.

ngapura lebur dosa.

jiwa raga lahir batin.

binerkahan kawidadan karaharjan.

Perbawane dina bada.

swasana sarwa asri.

abyor endah kang busana.

dhahar eca warni warni.

sami silaturahmi.

sagah suguh gupuh aruh.

ngelingi titah sawantah.

asal usuling ngaurip.

kang ginayuh murih tentreming bebrayan